Skreddar og spelemann

Jon Rosenlid var fødd på Fjelli i Stryn, og som kameraten Samuel Bergset fekk han tidleg kome i lære hos Magne Maurset på vanleg fele. Det var vanleg fele som var mest brukt i Nordfjord på denne tida, men 16 år gamal fekk han høyre Sjur Helgeland frå Voss. Det gjorde slikt inntrykk at han kjøpte seg hardingfele hos felemakar Rasmussen i Bergen.
Rosenlid flytte til Bergen i 1907, der han budde mesteparten av livet sitt. Her dreiv han sitt yrke som skreddar, og på fritida vart det tid til musikk. Han var med å stifta spelemannslaget Fjellbekken, der han og var leiar i mange år, og han var trufast dansespelemann for leikarringen i Bondeungdomslaget Ervingen i over 50 år. Den som har vidareført mest av Jon Rosenlid sitt spel er Finn Vabø i Bergen.

Mange speleferder

Det vart mange speleferder på Jon Rosenlid. I 1924 gjorde han stor lukke med konsertturne i Amerika, og i 1925 vann han Landskappleiken. Jon Rosenlid vart og kjend for sitt lydarspel, og komponerte både danseslåttar og lydarslåttar. I 1932 spelte han inn fleire slåttar på 78-plate saman med Leif Thomasgård. Ein har elles opptak av Rosenlid både i NRK sitt folkemusikkarkiv og i Arne Bjørndal-samlinga. Rosenlid var notekunnig og etterlet seg ei notesamling som tel kring 900 slåttar. Nokre av desse er hans eigne komposisjonar. I 1965 vart Jon Rosenlid heidra med Kongens Fortenestemedalje i gull for sin innsats som spelemann.