Som ein grøn oase ligg garden Tingastad mellom steile svaberg og uvennlege steinrøyser i strandkanten under Storehogen og Haukåsen, med utsikt mot Frønningen og Aurlandsfjorden. Her er veglaust, og garden er fråflytta. Nokre få hundre meter innom (austafor) gardshusa ligg ei lita vassdriven sag, som i dag er i De Heibergske Samlinger - Sogn Folkemusem si eige.
Skogen på Kvitingsmorki har i alle dagar høyrt til garden Natvik og var grunnlaget for ei eiga sag nedmed fjorden, kalla Kvitingssagi. Opplysningar om denne saga finn me attende til 1600-talet. Saga var i drift heilt fram til 1934 då storflaumen det året reiv henne bort.