Tilkomst

I dag er det 3 km skogsbilveg/dyrkingsveg til Hjelltunet og så 1 km traktorkøyrd rås opp til stølen. Rita Bente Hetle fortel at tidlegare brukte dei kring 1 time til stølen. Namn langs råsa frå Kvile var: Kvilabakkane og Kvilaledet, Gausmyra eller Danielhjellen, Slettegota med Supasteinen, Kronkelisvadet (halvvegs), Tikabakkgrova, Tikabakken, Tikabakkmyra, Snøfokemyra, Hjeltunbakken, Hjeltunmyra og Hjeltunbrua. Her var det kvile. Vidare Nederste rotevadet, Mittlia, Flaskesteinen og Høsebrekka.

Bruk av stølen

Det var vanleg å gå på stølen "etter kaffi". Det hende at kyrne "la seg att" og måtte då hentast. Om hausten i skodde og regn var ikkje det alltid lett. I eldre tider sila dei opp i treaskar og bar heim rømme og surmjølk kvar for seg. I dei seinare åra vart mjølka boren heim søt.

Frå vel 1940 tok stølsdrifta etter kvart slutt. Nokre heldt ut til kring 1960, så var det kulturbeitet heime som tok over. Stølskviene vart gjødsla og slått. Gamle folk meinte at frå gamalt av slo dei heile kvia i lag og delte høyet etterpå. Men så langt attende nolevande kan hugse slo dei kvar sine kvier. Dei siste slutta med denne slåtten kring 1960.

Nokre fakta

Hetle, gard nr. 99, Breim sokn, hadde 5 bruk i 1890.