Byrja som treskjerar
Bilethoggaren Anders Svor (1864-1929) byrja som treskjerar før han i tok til med modellering ved Den Kgl tegneskole i Kristiania, og i 1891 vann gullmedalje på ei utstilling i Berlin med skulpturen David. Fleire av arbeida hans kan knytast til unionsoppløysinga. Her skal vi trekkja fram to, - eit kunststykke i treskjering og ei byste i bronse. Begge kunstverka er i Svormuseet i Hornindal.
Kongskross - Oscar II
Olav Gullvåg fortel i boka - Anders Svor og Svor-museet - som kom ut i 1954, at kunstnarlivet til Anders Svor byrja med at han laga eit knivskaft etter skaftet på ein tollekniv han fann ein dag han var ute og gjette. I gutedagane eller dei fyrste ungdomsåra skar han óg ut ein kross eller eit "krusifiks" med kong Oscar II i midten, etter portrettet av kongen på to-kronestykka. Øvst sette han kongskrona over ein kvinnefigur (Mor Noreg), og ytst på armane monogrammet til kongen.
Christian Michelsen
Denne merkelege kongskrossen er det eine kunstverket i Svormuseet som kan "stillast ut" som eit 1905-minnesmerke i jubileumsåret 2005. Det andre er ei portrettbyste i bronse av Christian Michelsen (1857-1925), laga i 1906 og i si tid utstilt på fleire utstillingar: Kunstforeningen i Oslo 1906, Blomqvist Kunsthandel Oslo, 1906, statens årlege kunstutstilling "Høstutstillingen", Oslo i 1907, og Noregs Jubileumsutstilling i Oslo 1914. Bysta er no oppbevart i Svormuseet saman med tre ulike gipseksemplar. Dessutan har museet fire utgåver "portrettfigurar Christian Michelsen, ståande," alt i følgje boka til Gullvåg og Svor.
Tre andre i 7. juni-regjeringa
Utanom sjefen for 7. juni-regjeringa, har Anders Svor modellert tre av ministrane: 1) Sofus A.B. Arctander (1845-1924), 2) Gunnar Knudsen (1848-1928), i Stortinget, og 3) Jørgen Løvland (1848-1922), på Vår Frelsers gravlund, reist av Noregs Mållag m.fl. Ved avdukinga 7. juni 1928 heldt professor Halvdan Koth avdukingstalen.