Sivle-samlinga
Samlinga har om lag 100 gjenstandar etter diktaren Per Sivle, og omfattar både bøker, foto, og små og store gjenstandar. Mellom anna kan ein sjå dåpshua til Sivle og ABC-boka hans, eit koppasett og den spesielle Huldresølja.
Diktinga hans finn ein i tidlege bokutgåver. Per Sivle var fødd i Flåm i Aurland kommune i 1857, men voks opp på garden Brekke ved Stalheim. Dottera Sussie Sivle overrekte samlinga til kommunen i 1953, og er no på plass i Lokalhistorisk senter på Aurlandsvangen.
Utstilling av store foto
Aurland sogelag stiller ut storfoto med gamle motiv frå kommunen. Det er mange fine landskapsmotiv, men òg bilete frå arbeidslivet på gard og støl. Her er òg foto av kyrkjene i kommunen, forsamlingshus og bustadhus. Bileta er frå kring 1870, og femner også om anleggstida på Bergensbana fyrst på 1900-talet og på Flåmsbana i 1920- og 30-åra.
Lokalhistorisk litteratur
Aurland har eit rikt utval av lokalhistorisk litteratur. Mannen bak det aller meste av denne produksjonen er historikaren Anders Ohnstad frå Aurland.
Ved tusenårsskiftet føreligg 12 bøker/hefte som inneheld ættesoge, kultursoge, gardssoge, og elles glimt frå Aurland gjenom tidene. To nye gardssoger er under arbeid. Aurland sogelag stiller ut litteraturen i Lokalhistorisk senter, der ein og kan kjøpa bøkene og hefta.
Utvandrarutstilling
Aurland kulturkontor presenterer ei utvandrarutstilling frå 1994, som er ei 150-års markering av utvandringa frå Aurland til Amerika. Utstillinga viser med kart, grafisk framsyning, bilete og tekster glimt frå denne utvandringa, som tok til i 1844.
I utstillinga finn publikum større og mindre slektssoger, laga av norskætta amerikanarar. Her er òg mange bilete. Aurland kommune inngjekk i 1997 ein vennskapsavtale med Cannon Falls Township, Goodhue County, Minnesota.
Andre utstillingar
I Lokalhistorisk senter har kulturkontoret og sogelaget elles utstillingar på tema som jordbruk og stølsliv, jakt og fiske, folk og kyrkje, næring og kultur, m. m., og elles ulike tema som får plass i tur og orden.
