Byggjemåte og byggjestil

Transformatorkiosken er frå tida då den elektrisk straumen vart bygd ut i Gloppen, i 1920- og 1930-åra. Han er ført opp i betong og naturstein. Kiosken er bygd i ein stil som representerer klassisismen på 1920-talet, noko som mellom anna viser seg i søylene på bygget. Stilarten finn vi først og fremst i industrimiljøa, og han er heller sjeldsynt i fylket vårt, sjølv om vi finn døme på bygningar i denne stilen både i Høyanger, Årdal og Svelgen.

Tekniske installasjonar

Frå først av var det sett opp ein 40 KVA-transformator på Sandane. Det viste seg snart at han vart for liten, og i 1918 vart det bygt to kioskar, Gåsemyrkiosken, og ein liknande på Øyrane. I kiosken på Øyrane vart det montert inn ein 100 KVA-transformator, medan det i kiosken på Sandane vart sett inn ein på 200 KVA.

Kulturminne og utviklingshistorie

Kiosken vart teken ut av bruk i 1987, og har no status som teknisk kulturminne. Ei av hovudmålsetjingane med kulturminnevernet er å sikre dei mest verdfulle kulturminnemiljøa og einskildobjekta i lokalsamfunna, slik at desse kan gje eit best mogleg bilete av staden si utvikling og historie. Gåsemyrkiosken er eit døme på eit kulturminne som viser ein viktig faktor i utviklinga av tettstaden Sandane, nemleg elektrisiteten. Det vil vere umogeleg å tenkje seg ei utvikling som den vi har sett dei siste 80 åra, utan den elektriske straumen.
Gåsemyrkiosken er i dag eit lite landemerke slik han står med fine murar rundt seg. Han er eit verneverdig teknisk kulturminne, og bør difor ikkje rivast, slik det vart søkt om i 1994. Ein må i dag gå over privat grunn om ein skal kome heilt fram til kiosken.