Eit område fullt av krigsminne
På Staveneset bur i 2001 Olav Saltskår, son til Chester og Petrine Saltskår som under andre verdskrigen husa spionar her, og som i 1942 rømde over til Skottland med flybåt. Saltskår har samla mykje historisk materiale, særleg frå andre verdskrigen. På veg frå Staveneset til Holevika er minneplater sett opp til minne om engelske og norske flygarar som omkom i 1943.
Verdskrig og kystkultur
Ved vegs ende i Holevika står den gamle skulen som vart nedlagt i 1956 då krinsen vart slått saman med Stubseid krins. I 2000 står alle pultane framleis og minner om ei tid då det budde mykje meir folk her, og Saltskår er omvisar i ei samling som ikkje berre inneheld krigsminne, men som også gjev eit innblikk i ein kystkultur som held på å døy ut. Skulen er eigd av Kystmuseet i Florø.
Her står gjenstandar som gamle oppfyringsmaskiner, deler frå havarerte fly inkludert ei vengje, aggregatet til radiosendaren som agentane på Staveneset brukte, samt gamle radioar og eit hakekorsflagg. Veggene er dekorerte med sjøkart og plansjar med avisutklipp og anna stoff som fortel om hendingane her ute under krigen.