Tilkomst

Stølsråsa går på skrå oppover lia frå Solheim. Høgdeskilnad kring 250 m og rimeleg grei å bruke. Her går det og no ca 3 km skogstraktorveg oppover. I dag kan ein og reise med bil via Engeset og Fjellvegen til Bergestølen (fellesfjøs) og så kort rås til stølen.

Bruk av stølen

På Kulturnett Sogn og Fjordane (Internett), er innlagt ei stølsliste frå 1930-åra. Der står det om denne stølen at den ikkje hadde vore i jamt bruk dei siste åra.
Dette er lenge sidan og det er i dag vanskeleg å få opplysningar om stølsbruken. Vi må gå ut frå at her var vanleg stølsdrift som for mjølkestølar: Å gå på stølen fram mot kvelden for å mjølke og deretter heim att etter morgonmjølkinga. Mjølka vart truleg sett til syrning på stølen og rømmen heimboren dagleg av stølsjentene.
Den kvia som er innegjerda i dag, er så pass lita at det måtte bli lite å slå på for kvar. Men alt tilgjengeleg fór vart alltid utnytta best mogeleg. Grasveksten på kvia viser at her har husdyrgjødsla vore brukt og graset heilt sikkert hausta.

Gamlestøylen skal ligge noko nærare tuna og var truleg ein vårstøl.

Nokre fakta

Fjølestad, gard nr. 70, hadde 3 bruk i 1890. Solheim, gard nr. 71, hadde same året 2 bruk. Det budde i alt 24 menneske på Fjellestad i 1865, mot 23 i 1900. På Solheim finn vi 16 personar i 1865, same talet finn vi og i 1900.