Innreiing og husgeråd
I dei tre bustadhusa har det vore heller enkel innreiing etter vår målestokk. Berre i hus A er det funne restar etter ein pall langs den eine langveggen, men truleg har det vore slike låge, breie sove- og liggjeplassar i alle dei tre bustadhusa.
Eldstad
Alle dei tre husa har hatt eldstad, plassert i den indre delen av huset. Eldstaden var bygt opp ca 25 cm over golvet av flate steinar, og har vore om lag 1, 5 meter lang og 50-60 cm brei. Eldstaden har gitt både lys og varme, og har truleg og vore nytta til matlaging. Kan henda har dei hengt gryta i ei jarnskjerding over åra? Gryta har truleg vore av jarn eller kleberstein. Det er berre funne eit fragment av kleberkar på Ytre Moa. Fragmentet hadde eit drilla hol, truleg til å feste hanken i. Forutan dette karfragmentet, er det funne eit fragment av ei steikjepanne i ei av tuftene.
Laga mat i kokegroper
Til matlaging nytta dei også kokegroper, som ein t.d har funne i to av husa, plassert framfor åra, inn mot midten av husa. I hus A fann ein også deler av ein handkvernstein, som fortel at dei malte kornet inne i huset. Det er ikkje funne restar etter krustøy, koppar og kar - bortsett frå eit lite fragment av eit grønt beger av glas. Fragmentet var for lite til at vi kan seie noko om kva type beger det er eller når det vart produsert. Det er også uråd å seie noko om form, storleik eller funksjon - om det har vore nytta til kvardag eller fest.
Kister og skrin
Forutan gryter, høyrde elles kister og skrin til innbuet i husa. I ei av gravene vart det funne skrinhaspar, mens det i ei av tuftene vart funne eit fragment av tetningskitt. Tetningskittet - som kan vere av kvae- vart brukt til å tette tretiner eller øskjer. I same tufta vart det også funne eit keramikkfragment - rett nok datert til 4-600-talet. Kanskje viser det at det har vore busetnad på staden før vikingtida? Knivar, bryner, eldstål og eldflint har vore viktige gjenstandar i det daglege livet. På Ytre Moa finn vi mange knivar, både små og store, som har vore brukte både i matlaging, til skinn-, tre- og tekstilarbeid og anna arbeid på garden.
Smykke og personleg utstyr
I fleire av tuftene og i nokre av gravrøysene vart det funne smykke av bronse, mellom anna eit lite fragment av eit fint dekorert, treflika spenne av bronse og eit forgylt hengjesmykke i bronse med gripedyrsmotiv. Motivet på hengjesmykket tilhøyrer den såkall Borrestilen, og kan daterast til omkring år 900, medan den treflika spenna som er dekorert med spiralornamentikk kan daterast til siste halvdel av 800-talet. Det vart og funne ei draktnål i bronse og fleire glasperler, samt to rakeknivar av jarn.
Pynta seg med luksusvarer
Samla sett er ikkje smykkematerialet spesielt rikt, men det fortel at dei som budde på Ytre Moa pynta seg med luksusvarer som dei handla til seg frå andre stader i Norge, eller i utlandet. Kan hende tilverka dei også prydsaker sjølve? Hengjesmykket som vart funne i tuft B har tydelege spor etter filing på baksida. Dette kan tyde på dei ikkje var heilt ferdige med tilverkinga før det vart tapt, mista eller gløymt. I same tufta der dei fann dette smykket, vart det også funne reiskapar som som truleg har med metallarbeid å gjere - fil, meisel og kanskje drill. Dette styrkjer teorien om at smykket kan ha vore produsert på Ytre Moa.
Handverk
Av andre gjenstandar som er funne på Ytre Moa, er m.a. reiskap nytta til tekstiltilverking (saks, vevlodd, spinnehjul), jarnarbeid (smieslagg og hammar, meisel, fil, bor) og reiskap knytt til både bygningsarbeid og tilverking av tre. Dette er vanlege reiskap som ein kunne forvente å finne på ein vikingtidsgard, der sjølvberging og allsidig verksemd har vore vanleg og naudsynt.
