Biskop Erik Pontoppidan
Bergensbiskopen Erik Pontoppidan reiste gjennom Lærdal i 1749. Som den allsidige personen han var, laga han notatar og skisser av interessante ting under vegs. Difor har me både tekst og bilete til postvegen. I Norges Naturlige Historie skriv han om store steinskred:
"Fodspor af saadan Berg-Rap seer man blant andet allerkiendeligst ved Steene-Broe i Lærdalen, paa de saakaldede Gallere. Der sees, at det steile Field ved siden har tabt et løsreven Stykke, større end det største Slot i Verden. Dets Stykker, nogle saa store som Huse, andre minder, men alle saa kantede, som det kunde være sønderslagen Glas, ligge der i Millioners Tal, og give Elven en brusende Fart, i det den trænger sig igjennem disse ruinas horrendas, over hvilke meget møisommelig er practiseret en Vey saa vanskelig, som nogensteds i Verden".
Rodeinndeling
I rodepapir frå 1767 er opplista gardane som hadde pliktarbeid på postvegen: "Rode 6: Fra Seelte til Seeltaasen ere Opsiderne af Øye, Mielde, Schier, Hundøren og Hauge.
Rode 7: Fra Seeltaasen til Steene henhører Opsiderne af Seelte, Søre Biørchum, Honje, Moe, Raae, Richum og alle 3 Bøe Gaarderne.
Rode 8: Fra Steene og Øvre Ødegaarden arbeider Aardahls Skibsredes Almue".
Kaptein Jürgensen sitt kart
Kaptein Wilhelm Jürgensen laga kart over Lærdal og over den planlagde kongevegen over til Valdres. Han har òg teikna inn postvegen over Seltåsen og Steinsåsen. Kartet viser også at Sverrestigen var hovudveg på den tida. Dei to vegane er lagt på same måte i terrenget, der det var lettast å koma fram.
Anleggsveg 1845-47
Kaptein Henrik Christian Finne (1762-1870) bygde veg over same åsane 1845-47 "paa den Side af Elven hvor den har ligget tilforn", skriv han.
Kaptein Finne sin veg er best kjent som Gamle Seltåsvegen. Postvegen har mange merke etter anleggstida. Det skulle mykje stein til alle murane. Ein god del henta han frå fjellfoten og drog det fram på postvegen. Til tider var 300 mann i arbeid. Dei trong overnatting og ein del rydda seg plass i holer og hellerar. To "anleggsleirar" og ein del enkle hellerar er å finne i Steinsåsen.
Turvegar
Kaptein Finne sin veg, god kjerreveg, ligg grasgrodd og vakker på høge murar. Postvegen smyg seg fram i furuskogen med mange merker etter gammal historie. I sumarhalvåret står det skilt som fortel historia til vegane. Med utgangspunkt i rasteplassen i Koren, ca 1 km opp for Seltun, er det ein fin rundtur å gå opp til Steine på kaptein Finne sin veg og postvegen nedatt, ein passeleg ettermiddagstur.
