Særprega miljø

Gardane Sølvberg og Bergset ligg 3-400 meter over fjorden. Ved fjorden har begge gardane nausta sine. Miljøet her er teke godt vare på. Her har det vore fleire sagbruk, fleire små bryggjer der større båtar kunne leggja til og det budde i si tid fire familiar ved stranda her. Miljøa fortel om stor aktivitet i eldre tid.

Jekter og kyrkjebåtar

Både Bergset og Sølvberg hadde jekter som i hovudsak vart nytta til å føra varer til og frå Bergen. Til desse høyrde det jektenaust og jekteløkar. Jektene drog til byen med ved, tømmer, tønneband, bastetog og andre varer som dei produserte på gardane. Det var eit yrande liv ved fjorden når alle var opptekne med å gjera klart alt som skulle vera med jekta. Lastinga var eit stort arbeid.
På denne staden var det òg naust for kyrkjebåtane som dei nytta på kyrkjeferder til Utvik kvar preikesøndag. Det var i alle fall fast i sommarhalvåret. Til vanleg var det folk frå alle heimar med til kyrkje. Kyrkjebåtane "Rols" frå Sølvberg og "Fram" frå Bergset var i fast aktivitet på fjorden så lenge folk reiste til kyrkja i Utvik.

Restaurering

Dei seinare åra har folk fått større interesse for det gamle miljøet ved fjorden. Eit stort arbeid har vorte lagt ned for å restaurera nokre av dei gamle nausta. Dei har òg rydda dei gamle stiane frå gardane og ned til fjorden, og ei av dei gamle bryggjene er bygt opp att. Eitt av dei gamle sagbruka er framleis i god stand.
Husa på Skreddarplassen, der det budde folk lengst, står om lag som dei stod for 70-80 år sidan. Det har no vorte tradisjon med ei naustmesse her kvar pinsehelg. Då deltek alle prestane i innfjorden og det kjem tilreisande folk frå alle bygdene.