Tilkomst
Det gjekk 1 - 1,5 time å fylgje råsa oppover lia til stølen. I dag er det 3 km skogsbil-/dyrkingsveg til Hjelltunet, og vidare vel 2 km rås.
Bruk av stølen
I seinare tid rekna dei med at det var 30-40 kyr på stølen til vanleg. I tillegg kunne det vere kviger. Drifta var vanleg med å setje mjølka til syrning i treasker, fløyta av rømmen etter ca 3 dagar, bære heim surmjølka dagleg og rømmen ein gong i veka. Dei reiste til stølen først i juli og heim att i slutten av august.
Etter slåtten heime, var det å ta stølsslåtten. Det gjekk nok nokre dagar før dei var ferdige og høyet forsvarleg innlagt på fjøslemmen. Høyet vart frakta heim på slede om vinteren. Det vart slutt på vanleg stølsdrift og slått omkring 1950.
Klebersteinsbrot og tjøremile
I skogen mellom innmark og stølsmark stikk det opp mindre felt med olivinfjell. I ytterkant av desse finn vi ofte nærslekta bergarter som til dømes kleberstein. I utmarka til bruk 2 på Kvile har dei no funna eit klebersteinsbrot i kanten av Holten. Her ser vi tydeleg korleis dei har hogd ut emne til gryter.
Skogen har og vore viktig som råstoff for tjørebrenning. Mellom innmark og stølsmark finn dei rester etter tjøremiler. Nokre av desse har eigne namn. På bruk 1 har vi m.a. Davidhjellen (tjørehjell) som ligg rett ved den gamle stølsråsa.
Nokre fakta
Kvile, gard nr 81, Breim sokn, hadde 5 bruk i 1890.
