Lite vart kasta etter slaktinga

I det mystiske landet "gamle dagar", kan vi fortelje ungane, måtte det meste lagast heime og ein måtte bruke det ein hadde for hand. Det var synd å kaste noko som kunne brukast. Avfallsdungane etter slakting var ikkje store. Dei fleste hinner i dyrekroppane vart brukt. Kjent for mange er pølseskinn av tarmar. Hinnene i frå magane vart til dømes brukt til blodpølseskinn. Dette vert enno gjort. På ei skjålykt er hinna rundt lykta av vombskinn.

Pung til behaldar og jur til pålegg

Ikkje like utbredt lenger og relativt eksotisk er vel bruken av urinblæra til behaldar. I frå større dyr var pungen også ein naturlig forma behaldar. Den kunne brukast til å ha fyrtøyet i. Jur vart ikkje berre brukt som tørka hinne, det kunne og bli pressa og kokt til pålegg saman med tunge. Det er ikkje sikre opplysningar om kva denne silen vart brukt til, men truleg er det ein mjølkesil.