Kunstnaren Johannes Vinjum

Vinjum var fødd i Aurland 1930. Den flotte og majestetiske naturen i heimbygda var ein sterk inspirasjon for den unge kunstnaren, som alt svært ung bestemte seg for å bli kunstnar. Lærarar og medstudentar på Statens Kunstakademi (1953-56) blinka han ut som eit talent utanom det vanlege. Vinjum meistra både måling og teikning på ein svært overtydande måte.
Bernard Rostad seier i ein omtale at "kritikkene var entydige: En følsom menneske- og naturskildrer." Han var busett i Oslo, men er gravlagd i Aurland. Johannes Vinjun døydde i 1991.

Utdanning og utstillingar

Han utdanna seg ved Statens Håndverks- og Kunstindustriskole, Statens Kunstakademi og var stipendiat ved Accademia di Bella Arti i Firenze.
Vinjum stilte ut kunsten sin i fleire kollektivutstillingar, blant desse Nordisk Grafikkunions, Stockholm 1960, Ungdomsbiennalen i Paris 1963, Nordisk Kunstnerfobunds vandreutstilling 1973 og ein i Tyskland. Vinteren 1978 hadde han to separatutstillingar i Kunstnerforbundet og i Galleri K.

Galleri Vinjum

Galleri Vinjum vart offisielt opna 13. november 1993 i dei ledige lokala i det gamle Heradshuset på Aurlandsvangen. Mange tusen menneske, både frå inn- og utland, har sidan besøkt galleriet. Barndomsheimen til Johannes Vinjum ligg berre knapt fem minutts gange frå utstillingslokala.