Kjelfossen
Kjelfossen, som òg går under nemninga Stor Kjelfossen er ein del av elva Kjelfossgrovi, som kjem ned frå fjellvatna Kjelfossvotni på om lag 1180 meters høgd. Fossen renn sør for garden Ramsøy og aust for Gudvangen i enden av Nærøyfjorden. Kjelfossen kan skilte med eit fritt fall på 150 meter og eit fall på 840 meter totalt. Ifylgje Statistisk Sentralbyrå er dette det høgste fossefallet i Noreg.
Kjelfossen skal ha fått namnet sitt etter at ei budeie mista ystekjelen sin utfor fossen. Ifylgje segna hadde ho sett kjelen frå seg i grova, men la ikkje merke til at vatnet steig. Såleis endte det med at kjelen flaut opp og følgde med utfor fjellkanten.
Tufteelvi
På veg ut Nærøyfjorden er grenda Bakka fyrste busetnad etter Gudvangen og Ramsøy. Grenda ligg på vestsida av fjorden og består av gardane Bakka og Tufto. Ved Tufto kjem elva Tuftaelvi ned frå fjellet. Langs denne elva går stølvegen til stølane Rimstigen, Breidalen og Røyrdotten oppover fjellsida, på det høgste opp til 1300 moh.
Odnesfossen og Styvefossen
Like rundt neste "sving" i fjorden kjem vi til den korte, men vakre Odnesfossen. Odnes er slåttemark tilhøyrande garden Styvi, og takka vere det godt skjøtta kulturlandskapet kjem fosse godt til sin rett i landskapet. Bak tunet på Styvi kjem elva Styviselvi ned frå fjellet og dannar eit lite fossefall. Dei to fossane på Styvi kan opplevast på nært hald ved å gå den gamle postvegen mellom Styvi og den såkalla Bleiklindi, ei lind som har gule blad på vår- og sommarstid og grøne blad om hausten. Dette skuldast truleg ein mutasjon, men har vorte ein attraksjon for besøkande i området.
Lægdafossen og Sagelvi
Ytst i Nærøyfjorden, like før fjordskiljet ved Aurlandsfjorden ligg neset Krossnes. Før ein når dette neset kjem Sagelvi og Lægdafossen. Fossen er rekna som eit av dei viktigaste fossefalla innanfor Nærøyfjorden verdsarvområde med sitt fall på 75 meter. På stølen Lægdene oppe på fjellet var det midt på 1800-talet god furuskog som vart hoggen. Namnet Sagelvi nedanfor stølen vitnar om tidlegare sagbruksaktivitet langs elva.
