Verksemda i Bøvika vart starta av Jørgen Klausen i 1948. Broren Olav kom med seinare, og vart dagleg leiar. Til 1980 vart verksemda kalla Brødrene Klausen, og frå 1981, Klausen Mekaniske Verksted A/S. Det store industrianlegget er eit dominerande innslag i bygdebiletet, og ei hjørnesteinbedrift i bygda.
Eit moderne småskipsverft i Leirvik byggjer skip opp til 12 000 tonn dv. Verksemda vart starta opp som slipp og smie i 1918 av Jonas Løland (1877-1960), og er den eldste verksemda i sitt slag i Sogn og Fjordane.
Langt vest i Fjaler kommune ligg garden Våge, inst i Bygdevågen. Hit kom Bertel Spord i 1905. Ei tid reiste han rundt og sette inn motorar i båtar. I 1935 bygde han slipp på Våge. Slippen vart i 1997 foreslått freda.