Lærde hjå Spelar-Ola

Nils Furnes vaks opp i Gaular. Som 9-åring høyrde han farbroren Ola Nos (1849-1923) spele i eit bryllaup, og dette gjorde sterkt inntrykk på han. Nils fekk lære slåttar av farbroren, Spelar-Ola, som han vart kalla, og er den siste opp til vår tid som har lært slåttar direkte etter Ola Nos. Spelar-Ola hadde sine slåttar att etter faren Nils og etter Gunnar Lundekvam. Frå bygdene i indre Sunnfjord var det mykje spurnad etter Ola Nos som bryllaupsspelemann.

Aktiv spelemann i Fjellbekken

Som 23-åring reste Nils Furnes til Bergen, og han budde der sidan. Han var ein av skiparane av eit spelemannslag der i 1929, det laget som seinare vart spelemannslaget Fjellbekken. Der var han fast medlem så lenge han levde, og vart utnemnd til æremedlem i laget. I Bergen spelte Furnes saman med m.a. Arne Bjørndal, som og gjorde mange opptak med han. Furnes har spela inn sunnfjordslåttar for NRK i 1961.