Tett attmed stien
I 1941 observerte arkeologen Per Fett tre lokalitetar med skålgroper (gropeberg) ikkje langt frå kvarandre ved staden kalla Øpstestølen. Det eine feltet ligg kloss i stien. På ein slakt skrånande bergflekk kring 2 x 2 meter er det lett å få auge på små, runde groper. Dei ligg tett i tett og er av ulik storleik. Den største har ein diameter på 10 cm og er mellom 3 og 4 cm djup. På alle sidene av bergflekken gror det gras og mose innover berget, og det kan godt vera det gøymer seg fleire groper under grolaget. Somme som stoggar her vil spørja: Kva er no dette for noko?
Skålgroper - ein type helleristing
Det er helleristningar. Helleristingane fell i to grupper, veideristingar og jordbruksristingar. Den vanlegaste figuren i jordbruksristingane er skålgropene. Andre figurar er forma som skip, sirklar, spiralar, hjulkrossar, menneske, o.a. Skålgropene finst i store mengder i gode jordbruksområde som Østfold-Bohuslen, på Jæren, i Trøndelag og i fleire Austlandsbygder. Jordbruksristningane er knytta til jordbruk og jordbruksmiljø, og ein set dei i samband med grøderikdomskultus. Dei vart for ein stor del laga i bronsealderen (2000-500 f.Kr.), men førekjem òg seinare, heilt fram til 600-900 e.Kr.
Skålgroper to stader i Leikanger
I den gode beitedalen Friksdalen i Leikanger på staden Svolset (kring 800 m o.h.), vart det på slutten av 1900-talet oppdaga ei samling svært gamle hustufter. Etter fleire utgravingar meiner arkeologane at folk brukte Friksdalen som stølsområde i fleire hundre år frå Kristi fødsel, med størst aktivitet i perioden 600-900 e.Kr. Det vart og oppdaga fleire jordfaste steinar med skålgroper. Skålgropene i Friksdalen og ved Kjerringamyri har fleire fellestrekk. Dei førekjem i tette samlingar på fleire lokalitetar, dei er av ulik storleik opp til 10 cm i diameter, dei ligg etter måten høgt over havet, i utmarksområde, høvesvis 800 og snaue 600 m o.h.
I Sogn og Valdres
Arkeologen Sonja M. Innselset har forska på helleristingane i Sogn og Valdres. På 1990-talet visste ein om vel 2700 skålgroper i Sogn og vel 700 i Valdres. I Sogn har Luster har flest med 160 felt fordelt på 41 ulike lokalitetar, Aurland har ristingar på sju stader, i Lærdal er påvist opp imot 50 groper, i Vik 39, og i Leikanger tre felt på Svolset med over 100 groper og kring 140 groper ved Kjerringamyri. I Årdal og Sogndal er det derimot til denne tid ikkje påvist skålgroper.
Innselset ser på skålgropene i Valdres som eit framhald av ristingane i Sogn, og det er langt til andre ristingar vidare austover. Eit fellestrekk ved sogneristingane og valdresristingane er dei ligg i typiske utmarksområde, støls- eller beiteområde, høvesvis 85 % og 70 %.
