Tilkomst

Det kan vere ca 2,5 km opp til stølen. Råsa er til dels noko bratt og i 1901 vart ho hellelagd. I det brattaste går den i trappetrin. Den øvre del av råsa er fint vedlikehalden og er også brukt av folk som vil opp på fjellområda mot Hyefjorden. I 1959 bygde Firdakraft veg opp Hestedalen for å ha tilsyn og stell med kraftlinja. Dette vart til god hjelp for utnytting av skog- og fjellområda der. Rauset bygde og skogtraktorveg opp mot stølen for kort tid sidan. No kan vi rekne med ca 1 km bilveg + 1,5 km skogstraktorveg mot stølen.

Bruk av stølen

Rauset hadde ein eldre støl, Gamlestøylen, som ein finn tufter av ved noverande veg mot Sandstøylen, om lag 2 km ovanfor Rausettuna. Denne stølen låg ca. 375 m o.h.

Buskapen var fyrst på beite i utmarka. På kartet er avmerka hustufter på Bulegene. Dette må nok reknast som gardfjøsar og at budeiene gjekk heim morgon og kveld. Flytting til stølen var omkring jonsok og dyra var der til ca. Mikjelsmess (29. September).
I bygdeboka står der: "I 1963 slutta fire av brukarane med stølsdrifta, ein held framleis krøtera sine der nokre få veker på ettersommaren." No driv ingen med tradisjonell stølsdrift.

Slåtten var viktig på dei velstelte kviene. Høyet vart meisa ned, dvs. pakka inn i grove tausekker og rulla nedover lia eller fjellsida. Noko hadde dei att på fjøslemmen som tilskot til dyra på styggedagar seinhaustes.

Nokre fakta

Rauset, gard nr. 14, hadde 6 bruk i 1890. Folketalet på garden var 44 i 1865 og 35 i 1900.