Kanskje frå garden Sande
Det vert fortalt at denne steinen opphavleg stod på garden Sande om lag 1 kilometer vest for Bale. Sorenskrivardottera Mette Marie Bramdrup vart då gift med kaptein Meidell i Flesje. Ho flytte då dit. Soga vil ha det til at steinen vart med på flyttelasset. Då konservator Lorange ved Bergen Museum ein gong vitja Flesje, "oppdaga" han steinen i hagen. Lorange tok då del i arbeidet med å ta vare på haugane på Bale. Lorange overtalte Meidell til å gje frå seg steinen slik at den kunne pryda Balahaugen når restaureringa var ferdig.
25 mann og 4 hestar
Lærar og kyrkjesongar Anders P. Øvrebø var den lokale drivkrafta i dette vernearbeidet. I februar 1887 samla han 25 mann og 4 hestar. Oppdraget var å køyra bautasteinen frå Flesje til Balahaugen. Det var godt vinterføre, og første del av turen gjekk fint. Ved Sandvika på Tue er det ein bratt bakke opp til Rørehaugen. Her vart steinen for tung. Øvrebø gjekk då opp på ein liten haug ved vegen. Der heldt han ein sterkt manande tale til hjelpesmennene sine. Han eggja dei og sa at steinen skulle reisast på ein vikinghaug. No galdt det å få steinen fram. Balestrendingane laut syna at dei var karar til å fullenda dette verket. Dette hjelpte.
Reist den 18. mai 1887
Etter det me kjenner til vart den sett opp den 18. mai 1887. Dei festa ei talje i bjørka og drog steinen opp. Bjørka bøygde seg mot steinen. Dei sa at bjørka helsa bautasteinen velkommen. Den 27. september 1887 kom saka om fredlysing av haugen opp i skulekommisjonen. Fylgjande tekst vart vedteken med 9 mot 5 stemmer.
"Den paa Klokkergarden Bale i Balestrands Prestegjeld beliggende Gravhaug fredlyses herved saaledes at den ikke maa ved Jordtag beskadiges eller ved Gravning forstyrres. Den paa Haugen reiste Bautasten maa ikke omstyrtes eller fjernes, ligesom de paa Haugen verende Træer ikke maa beskadiges, kvistes eller feldes."
Den 17. november 1887 vart teksten samrøystes vedteken av heradstyret.
"Desse moderne tingi"
I 1934 skreiv Haakon Shetelig om fornminne i Balestrand i bygdeboka som kom då. "På den eine står det ein moderne bautastein og på den andre den tyske biletstytta av kong Bele. Desse moderne tingi skjemmer dei gamle haugane. Steinbenken på den eine av haugane skal derimot vera ein gamal bautastein som fyrr stod på ein annan gravhaug, Ingeborgshaugen, dei kallar, (på br. nr. 36-37)."
Christian Meidell, son til Thomas Henrik Meidell, som gav frå seg steinen, gav og uttrykk for at flyttinga aldri skulle funne stad. Mellom folk i bygda i dag er vel meininga den at steinen høyrer til der den no står.
