Fleire linjekursar over Aurlandsfjellet

Bergen fekk i 1857 telegrafsamband med Christiania med ei linje langs Sørlandskysten. Dette sambandet vart hardt belasta med fleire stasjonar tilkopla og stor trafikk. Året etter, i 1858, vart det såleis sett i gang arbeid med ein ny linjekurs frå Lillehammer over Lærdal, Aurland og Voss til Bergen.
I månadskiftet oktober-november 1858 kunne det opnast telegrafstasjon i Lærdal, men hardaste stykka stod att, Aurlandsfjellet og overgangen til Voss. I ei skildring heiter det:
" - Linien mellem Leirdalsøren og Bergen fører gjennem det maaske vanskeligste Terrain i vort Land, med steile Fjeldsider langs Fjordene m.m.; saavel Arbeidet med Opsætning af Linien som Materiellets Frembringelse frembød ofte store Vanskeligheder, og ud paa Høsten herskede der adskillig Sykelighed blandt Arbeidstokken. -"
Ikkje å undrast på at arbeidarane var ved å miste motet, men endeleg, den 21. november 1859, kunne det nye Bergenssambandet takast i bruk.
Den eldste linjetraseen over Aurlandsfjellet, opp Erdalen og over fjellet til Skjerdalen, låg svært utsett til. I 1876 vart det difor bygt ny kurs over Horndalen-Midjefjellet til Vassbygdi, seinare over Kvammadalen mot Aurlandsvangen.

Linjehytter og stolpeskur

På fjellovergangane vart det sett opp fjellstover for linjearbeidarar og stolpeskur for stolpar og anna reservemateriell.
Skuret i Horndalen, oppsett i 1924, kom til erstatning for eit eldre skur ved Skjerdalslinja. Kostnaden, 800 kr, vart teken av linjene sitt vedlikhaldsbudsjett. Lengda er om lag 11,5 m, breidda om lag 3,0 m og høgda 2,80 m. Ramma er telefonpålar, ihopsette med jarnhakar, som kviler på eit fundament av 4-5 låge steinkjer. Reisverket er av 3 x 4 toms boks, og endeveggene og taket av vanlege bord.
Inne i skuret ligg framleis 5-6 reservestolpar og nokre ihopspikra fjølendar til "bord" og liggeunderlag.

Telenor sin plan for verneverdige bygg og installasjonar

Etter automatiseringa av telefonen på 1970 og 80-talet, var det ikkje lenger bruk for telefonlinjene over Aurlandsfjellet. Stolpeskuret kom i gløymeboka, og vart berre brukt av ein og annan turgåar eller saueleitar.
I 1998 fekk Telenor utarbeidt ein plan for verneverdige bygg og anlegg. Stolpeskuret i Horndalen kom med i verneplanen som det einaste i sitt slag som står att i si opphavelege form. Skuret er såleis teke vare på og ordna til. Ny kledning kom på i 2000-2001.