Gamal buføre- og kløvjeveg

Heilt fram til fylkesvegen kom i 1965, var gamle Tennevegen i Arnafjorden brukt som buføre- og kløvjeveg mellom bruka på Nese og heimestølen Tenne. Vegen er ca. 2 km. Frå Tenne går det stølsveg vidare til fjellstølane.

Så vidt me veit, er det ingen som kjenner til kor gamal denne vegen er. Men det vert fortalt av dei eldste i bygda i dag, at deira besteforeldre ikkje kunne hugsa vegen annleis, og at den trengde lite vøling.

Med hest og slede

Vegen har aldri vore nytta som køyreveg om sommaren, men folk hugsar at det vart køyrt heim ved med hest og slede på godt vinterføre. Lauvkjervar frå dei to lauvløene, som stod attmed vegen i Morki, vart borne heim på ryggen. Det same med almebork og almeskat frå Storalmbakkane.

Vegen halden ved like

Siste åra har vegen vorte rydda for busk og kratt, og det har vorte teke oppatt fleire veiter og elles vølt her og der.
Våren kjem tidleg på Tennevegen. Ein kan oppleva naturen med ein spasertur forbi heimste Okslere'set, Ja-benken, inste Okslere'set, Per-groi og Skillings-groi.