Flølo-komfyr med vasstank
«Per Flølo Elektro Mekaniske verkstad» på Sandane tok i 1926 patent på sin «Flølo-komfyr». Det geniale her var at komfyren hadde innebygd vasstank. Vatnet vart oppvarma av varmen frå kokeplatene og kunne tappast frå ei kran framme på apparatet. Det vart produsert slike omnar både med og utan steikjeomn. Biletet viser ein Flølokomfyr med steikjeplater, steikjeomn og vasstank.
Bakaromnar
Fleire små bedrifter i Nordfjord starta tidleg med produksjon av elektriske apparat. Båre Per Flølo og «Eids Elektro-Mek.Verkstad» på Nordfjordeid produserte bakaromnar eller steikjeomnar. Dette var omnar med berre steikefunksjon. Omnen på biletet frå Eids Elektro Mek. Verksted er truleg eigen oppfinning frå før 1917. I firmaet sin katalog står det «fra 3 til 150 1 kg.s brød». Truleg var slike omner mest for profesjonelle bakarar. Fleire lokale bakeri skaffa seg omnar frå Eid. Den første var bakar Gaasemyr på Sandane.
Andre produkt og produksjonen av komfyrar på landsbasis
Per Flølo produserte også kokeplater forutan varmeomnar. Det same gjorde verkstaden på Eid, dei var også særleg anerkjente for varmeomnane sine. Dei dreiv også installasjon og handel med lysartiklar. Elektriske komfyrer vart produsert i Norge frå 1913. Fram til 1920-21 var importen viktigast, men deretter auka eigenproduksjonen i Norge. I 1942 var omlag 95 prosent av solgte komfyrar produsert innanlands.
«En komfyr er noe man kjøper sig bare èn gang»
Sjølvom apparata var mogeleg å få tak i, var det ikkje sikkert tilgongen på kraft var god nok eller at det var økonomi i å skaffe seg slike apparat. «En komfyr er noe man kjøper sig bare èn gang» står det i boka «Vi koker elektrisk» frå 1939. I dette utsegnet ligg at det var dyrt å kjøpe komfyr, ei investering for livet. Det var den enkle kokeplata som kom først inn i heimane før den elektriske komfyren. Ei kokeplate var billegare i innkjøp og bruk.
Utbreiing
Vedomnen hadde lang levetid parallellt med innføringa av elektrisk kokeplate og komfyr. Samstundes var komfyren det første større elektriske apparatet som kom inn i den norske heimen. Då rasjoneringstida etter andre verdskrigen var over, byrja elektrifiseringa av heimane å ta meir av. I 1952 brukte hele 70 prosent av norske husmødre elektrisk komfyr.
Vart noko annleis?
Innføringa av elektriske apparat i matlaginga letta arbeidet ein del. Ein slapp å bere inn ved og kveikje i og bere aske ut. Varmen var lett å kontrollere og det vart difor lettare å få eit godt resultat. Komfyren kunne også plasserast tett inntil andre element i kjøkeneinnreiinga. Matstellet vart lettare og meir hygienisk. Når det gjeld matstellet førte ikkje overgongen til elektriske apparat dei heilt store endringane for folk. Endringane her var større då folk byrja ta i bruk frysar og kjøleskåp