Tilkomst

I dag er det kring 2 km rås frå riksveg 60 på Utvikfjellet. Frå eldre tider var det nokså lang tur opp gjennom bygda på dei utlagde stølsråsene.

Bruk av stølen

Jakob Fløtre fortel: "Stølen var framtil om lag 1927 brukt til mjølkekyr og sinakyr om lag 3 mnd for året. Talet på dyr kunne variere mykje. Mjølka vart for det meste bore heim i hylkje på ryggen, men ein del sett til rømaske til mat for stølsfolk og dei som kom på gjesting. Dei som gjekk til støls starta heimanfrå kl 04 om morgonen og turen tok om lag 1,5 time i vanleg gangfart.
Stølen var også brukt til overnatting og opphald for rypejegarar, då det i dei dagar var mykje ryper i området rundt stølen. Husdyrgjødsla vart delvis teke vare på og henta med hest og slede på vinterføre."

Etter Ålandsboka: "I 1600-aarstalet var det strid millom Flytra og Støyva med Bjørnerheim um fjell- og stølshamnen. Flytra som fyrr hadde støl i Holemarki, tok fyre 1650 stølshamn i Støyva- og Bjørnerheimsmarki". Det var fleire stridigheiter fram gjennom åra om dette. "Aar 1658 var det aastadsak der retten dømde at Flytra skulde ha støl som fyrr i Holi-marki daa Støyva og Bjørnerheim hadde so ring stølshamn at dei um sumaren maa leiga hamn i anna prestegjeld, og skulde andre støla paa dei, maatte dei "blifue fordærvet og gaa tilgrunde".
Restar etter hustuft noko nedanfor Fløtratjørna kan vere der Støyva hadde stølshus i denne tida.

Nokre fakta

Fløtre, gard nr. 103, hadde 5 bruk i 1890.