Markus-namn

Namnet har plassen fått etter Markus Bendikson, som var plassmann på Instebøen i åra 1881-1906. Som ein del av mangfaldet på garden vart det dyrka poteter på denne husmannsplassen, og potetåkeren låg i ein vestvend bakke kalla Bakkane sørvest for potetkjellaren. No vert staden gjerne kalla Markus-bakkane.

Nyttig jordkjellar

Potetkjellaren var bygd inn i terrenget. Slik vart potetene verna mot frosten. Framføre sjølve potetkjellaren var det ei smie. Smia og jordkjellaren hadde eit samanhengande tak. For å koma inn i kjellaren og henta ut poteter, måtte folk gå gjennom smia. Men når potetene skulle førast inn i jordkjellaren, slapp folket å bera dei gjennom smia. Gjennom ei luke i bakkant av taket var det lett å kvelva potetene ned i bingen. Kjellaren på Markus-plassen var i bruk til slutten av 1940-åra.

Samansigen jordkjellar

I dag er jordkjellaren på Tauning samansigen i framkant. Berre gjennom ei glipe under jord-taket kan ein få ein ørliten gløtt inn i rommet. Ein stor hegg har fram til nyleg vakse på taket og pressa kjellaren saman. Men truleg er sjølve jordkjellaren intakt.
Viss det kan finnast tilskot til rehabilitering, kan grunneigaren tenkja seg å setja inngangen til kjellaren i stand, og slik ta vare på dette kvardagskulturminnet.