Periodevis øyde
Namnet Dyrstad kjem truleg av mannsnamnet Dyri. Garden er nemnd første gong i 1612, då Oluff Torsteinson Diurstad budde her og la skatt og tiende. I 1626 heiter det i jordboka at garden for ei tid sidan "af Sne- og Fjeldskred ganske med Huse og Anmark (krøter) blev borttagen og nu igjen er saaed".
Dyrstad, eller Dalen, som han òg har vore kalla, låg til St. Jørgens hospital i Bergen, og i 1667 var skylda nedsett til 18 merker fisk eller 9 merker smør. Truleg vart skylda redusert fordi garden igjen hadde lide skade. Visst er det at garden i periodar ikkje var busett, til dømes i 1690-1701 og i 1812-1814.
I periodar har garden vore utan hus, og slåtten har då lege til ymse bruk nede i bygdene. Seinare ser det ut til at garden har vore delt og også tidvist nytta til seterdrift.
Gamle husmurar
I dag er det tre bruksnamn på den tidlegare garden Dyrstad: Dyrstad (bnr. 1), Sagabråten (bnr. 3) og Bakkebu (bnr. 5).
Vegen frå Berstadvatnet opp lia til Dyrstad er ganske bratt, men landskapet flatar seg ut når ein kjem opp mot innmarka. I den øvre enden av innmarka ligg murrestane etter dei tidlegare husa på garden. Det er registrert to tufter her. Begge tuftene er rektangulære. Den nordlegaste er ca. 9 x 4 m, den andre 10 x 4 m. Kring og inne i dei gamle murane veks det einer og litt bjørk. Også innmarka held no på å gro til.
Gjekk gjennom isen
I utmarka vest for Berstadelva skal det ha lege ein gard som heitte Solemb. Det heiter at folka på Solemb var i slekt med folka på Dyrstad. Ei segn fortel at ein gong skulle folka på Solemb i juleselskap til Dyrstad. Då gjekk dei gjennom isen på Berstadvatnet og alle drukna.